Fol turşusu

Fol turşusu (B9 vitamini) B qrupundan olan, suda həll olan vitamindir. Fol turşusunun çatışmazlığı – ən çox rast gəlinən hipovitaminozlardan biridir. Fol turşusu zülal mübadiləsində, böyümə və inkişaf proseslərində mühüm rol oynayır. Qaraciyərdə piy mübadiləsinə, xolesterinin və bir sıra vitaminlərin mübadiləsinə müsbət təsir edir. Reproduktiv yaşda olan qadınların sağlamlığının dəstəklənməsində fol turşusunun xüsusi əhəmiyyəti vardır, belə ki, hamiləlik dövründə onun çatışmazlığı vaxtından əvvəl doğuşa və sonradan uşağın fiziki və əqli inkişafdan qalmasına gətirib çıxara bilər.

Farmakoloji təsiri

Fol turşusu orqanizmdə baş verən bir çox mübadilə proseslərində, o cümlədən nuklein turşularının sintezində, zülal mübadiləsində, qan hüceyrələrinin formalaşmasında iştirak edir. Fol turşusunu ilk növbədə hamiləliyin planlanması mərhələsində və birinci trimestrində olan qadınlar döldə sinir borusunun inkişaf qüsurlarının profilaktikası məqsədi ilə qəbul etməlidirlər.